UNIVERSIDADE DA PAZ HAHU ENKONTRU PREPARASAUN ATIVIDADE PAK

UNIVERSIDADE DA PAZ HAHU ENKONTRU PREPARASAUN ATIVIDADE PAK

Dili, 02 Abril 2025 - Universidade Paz (UNPAZ) liu husi senadu Universidade no Fakuldade enkontru Preparasaun atividade pratika aprendizajen kampu (PAK) ba Estudante semester V husi Fakuldade neen iha tempu badak sei deskola ba ida-idak nia Munisípiu, Enkontru Preparasaun ne'e iha Aula Prof. Dr. Lucas da Costa.

Magnífiku Reitór UNPAZ, Dr. Adolmando Soares Amaral, Lic. Eco.,MM. hateten ita halo reuniaun ida ne’e, ita ko’alia kona-bá Preparasaun atividade Pratika Aprendizajen Kampu (PAK) ba estudante semester V no estudante semester VII ba estájiu institusional inklui haree kona-bá progresu aprendizajen ba estudante semester I ne’ebé fasilita husi AHHA Education Timor-Leste ba kursu lian ingles.

Reitór esplika objetivu husi PAK ne’e atu estudante tun direitamente ba moris hamutuk ho komunidade hodi sente saida mak povu sente, liu husi han hamutuk ho povu, hodi inventariza rekursu iha fatin ida ne’ebé mak bele sai alternativa ekonomia iha aldeia, tamba Estudante mak apriende ona siensia no teknolojia atu trasforma buat ne’ebé povu kuda iha nia valor ekonomia.

Magnifiku ne'e husu, Durante iha Pratika Aprendizajen Kampu (PAK), kada Fakuldade la’o tuir siensia no teknologia ne’ebé nia apriende, maibe la’os inventariza de’it rekursu ne’ebé mak iha Aldeia ne’e iha, maibe tenki halo intervensaun liu husi promosaun atu kompriende no hatene iha komunidade no transforma saida mak sira sente no haree atu nune’e bele iha nia valor ekonomia iha sosiedade nia moris.

Husi ida ne’e mak bele produs relatoriu ne’ebé di’ak, hodi halo seminariu iha kampus, atu nune'e ita bele entrega ba governu liu husi dadus ne’ebé iha Aldeia teritoriu laran, problema hanesan ekonomia, saúde no enjeñaria inklui sira seluk, sira ne'e mak ita sei entrega ba governu liu husi estájiu institusional ne'e, dehan Magnifiku.

Programa PAK ne'e iha ona matadalan propriu ne’ebé Universidade produs ona ba atividade Pratika Aprendizajen Kampus (PAK) ba estudante semester V, matadalan ne'e sei produs ba livru atu fahe ba estudante sira, atu utiliza iha prosesu PAK nian,

Magnifiku ne'e kontinua esplika ba sira katak, estudante sira lalika kumfuzaun ho kestionariu ida ne’ebé Universidade sei tatoli tuir ita bo’ot sira, atu halo mós survei kona-ba koñesementu lian nian.

PAK nia objetivu lolos mak fila ba ita nia Aldeia, exemplu hanesan estudante direitu, sa fenomena mak akontese iha Aldeia ne’e ligasaun ho área estudus ne’ebé estuda iha Fakuldade Direitu, hanesan mós Fakuldade sira seluk, estudante ida-idak inventariza asuntu tuir siensia ne’ebé apriende ona, ida ne’e mak UNPAZ hatur ona iha nia matadalan ba PAK nian ne'ebé mak tinan kotuk implementa ona iha RAEOA.

Estudante semester V hahu aban Quinta feira loron 03 Abril sei iha pembekalan husi Fakuldade sira no dia 04 ho 07 Abríl 2025 Universidade sei husu misa Agradesementu, tanba dia 07 Abríl 2025 estudante sira sei desloka idak-idak nia Munisípiu hodi implementa ona PAK

Entretantu iha enkontru ne’e, partisipa husi Magnífiku Reitór UNPAZ, Dr. Adolmando Soares Amaral, Lic. Eco.,MM. ho estrutura Universidade no estrutura Fakuldade, Pro-Reitor ADRH. Diretor UA-AAE.