UNPAZ- FAKULDADE TEKNOLOGIA AGRIKOLA REALIZA TOMADA DE POSSE SENADU SESANTE BA SENADU ELEITU

UNPAZ- FAKULDADE TEKNOLOGIA AGRIKOLA REALIZA TOMADA DE POSSE SENADU SESANTE BA SENADU ELEITU

Dili-Universidade da Paz (UNPAZ) liuhusi Fakuldade Teknologia Agrikola hala'o serimónia tomada de posse ba senadu estudantil no hametin lasu amizade entre dosente ho estudante tinan akadémiku 2022-2023, iha Kampus Satelite Liquisa (01/10).

Vice Reitor Asuntu Estudantil no Antigus Alunus, Sra. Marilia Juvi Gonsalves, Lic SP.,M. Kes. ne'ebé reprezenta Magnifiku Reitór, hateten bainhira ita asumi kargu hanesan senadu estusantil, ida ne'e responsabilidade bo'ot ida ba ita, bainhira ita asumi kargu ita dehan ha'u sai bo'ot, maibe ita sai atan iha momentu ida ne'e durante ita nia mandatu.

“Dala barak ema dehan, asume kargu sai bo'ot, maibe ba ha'u dehan katak, ha'u sai atan, tanba atividade saida de'it ita tenki tun direta nune'e elementu hotu bele partisipa iha momentu ida ne'e”,tenik Nia.

Vise ne'e hatutan, ita tenki realiza ita nia planu sira ne'ebé mak promesa ona, se la realiza di'ak liu lalikan promesa, ha'u fiar ho imi nia promesa iha tinan ida ne'e bele aumenta tán estudante barak iha fakuldade teknologia agrikola.

Dekanu Fakuldade Teknologia Agrikola Sr. Joni dos Santos Lic.Tec.Agr.M.,Agr, agradese ba estrutura universidade, maske dook maibe bele disponibilidade hodi marka prejensa iha fatin ida ne'e, agradese mós ba estrutura fakuldade nian, bele partisipa mós iha atividade ida ne'e, agradese mós ba komisaun organizadora ne'ebé servisu makas ba preparasaun fatin ida ne'e, nomós estudante sira hotu.

“Agradese no apresia ba senadu sesante, ba imi nia atividade maske iha situasaun covid nian ne'ebé prezudika tebes ita nia tempu atu bokan, maibe konsege ultrapasa imi nia atividade balu, ne'ebé ohin imi mensiona, ida ne'e di'ak tebes tanba imi nia dedikasaun no vontade no esperitu akadémiku ne'ebé forti tebes, hodi kolabora malu no organiza malu, hodi hala'o atividade sira ne'e, maske la 100% maibe imi konsege halo buat balu”,dehan Dekanu.

Nia esklarese, senadu eleitu ho estrutura tomak, buat ne'ebé imi promete iha juramentu tenki sai realidade, no imi tenki halo asaun no implenta programa sira ne'ebé ohin imi promesa, programa sira labele ses husi kreativu no inovativu.

Iha parte seluk, Senada Sesante Fakuldade Teknologia Agrikola, Umbelina de Jesus Guterres, rekomenda ba iha senadu eleitu ho estrutura tomak, nafatin kontinua no hatutan programa sira ne'ebé ami seidauk finaliza, nafatin kolabora ho estrutura fakuldade hodi bele realiza atividase sira ne'e.

Sorin seluk, Senadu Eleitu Fakuldade Teknologia Agrikola, Sancho Soares, salienta programa ne'ebé atu implementa mak hanesan: 1 Promove estudante sira hotu nia talentu, liuhusi debate, diskursu, hakerek poezia, 2 promove estudante sira nia talentu, desportu, jogu amizade volyball, basketball, no futsal, 3 kontinuasaun peodus kaus ne'ebé senada atual halo ona 50%, 4 produs jaket agrikultura, 5 halo separasaun di'ak ho PD3 hodi haree hamutuk programa estra kurikular no intrakurikular.

Partisipa iha serimónia tomada de posse ne'e, Vice Reitor Asuntu Estudantil no Antigus Alunus, Sra. Marilia Juvi Gonsalves, Lic SP.,M. Kes. Dekanu Fakuldade Teknologia Agrikola Sr. Joni dos Santos Lic.Tec.Agr.M.,Agr. Estrutura husi Fakuldade Teknologia Agrikola, Senada Sesante ho Senadu Eleitu ho estrutura tomak, Inklui estudante sira hotu husi Fakuldade Teknologia Agrikola.